الجبنة

طريقة عمل الجبنة :

المقادير :
1 كجم لبن _ قطعة جبنة قريش متوسطة _ كوب زبادى _ 1/2 م/ص ملح .

طريقة التحضير :
نغلى اللبن وبعد ان يغلى نرفعه من على النار ليهدأ حتى يصبح دافئ مايل للسخونة ، ونفتت قطعة الجبنة القريش على الزبادى ونقلبهم جيدا ثم نضيفهم للبن ومن الافضل ان نضع اللبن فى علبة ثلاجة وبعد وضع المكونات على بعض نغطى علبة الثلاجة بغطاها ونحكم غلقها ونتركها حوالى 8 ساعات ثم نفتحها ونكون مجهزين شاشة ومصفى سلك ونفرد الشاشة على المصفى ونضع اللى بداخل العلبة على الشاشة ونرش شوية ملح حسب الرغبة ونتركها فى الثلاجة لتانى يوم تكون اتصفت كويس ونزلت منها المية اللى بيقولوا عليها شرش وبالهنا والشفا وان شاء الله هتعجبكم .

ملحوظة : فى اكتر من طريقة لعما الجبنة يعنى ممكن نترك اللبن حتى يقطع وبعدين نصفيه ونرش عليه شوية ملح وممكن اننا بعد ما يسخن نضع اتنين ملعقة كبيرة خل ونسيبه دقيقتين على النار هنلاقى اللبن بيفصل من بعضه ويقطع بس الطريقة دى بتطلع حتة جبنة صغيرة وافضل طريقة هى اللى انا كتباها وهى افضلهم فى الطعم والكمية .

السوبيا

طريقة عمل السوبيا :


قبل ما اكتب المقادير وطريقة التحضير عايزة اقولكم ان السوبيا دى اللى بتتاكل مش اللى بتتشرب واللى بتتشرب ان شاء الله هبقى اكتبلكم مقادير البودر بتاعها مرة تانية هكتبها هى والتمر هندى والخروب والدوم .

المقادير :
1/2 ك ارز _ 2 ك زبادى كبير _ 1/2 م/ص ملح لمون _ 1/2 ك سكر _ 4 ك ماء _ باكو فانيليا _ 2 م/ك جوز هند _ قرفة للتزيين .

طريقة التحضير :
نحضر اناء ونضع فيه نصف كوب الارز و اربع اكواب الماء ونضعهم على نار هادئة مع ملاحظة تقليبه باستمرار حتى ينضج الارز تماما ويتشرب الماء وبعد ذلك نرفعه من على النار ونتركه حتى يبرد تماما وبعد ذلك نضعه فى الخلاط ونضيف عليه الزبادى والسكر وملح الليمون والفانيليا وبعد ذلك نضعه فى اناء ونضيف اتنين ملعقة جوز هند قشور ونضعه فى الثلاجة وبعد ان يصبح باردا نصبه فى اطباق الخشاف ونضع عليه رشة قرفة للتزيين .

ملحوظة : ملح الليمون موجود عند اى عطار ولما بنضعه بيعطى طعم مزز شوية و لو مش عايزين انها تكون سوبيا مززة ممكن الاستغناء عنه او وضع رشة صغيرة اوى منه ، والقرفة بتعطى طعم حلو اوى لما بنزين بيها السوبيا وكمان جوز الهند بيخلى السوبيا ليها طعم احلى ولو احنا مش متوفر عندنا الجوز الهند والقرفة وملح الليمون فى البيت يمكن عملها من غيرهم بس لو بيهم بيكون طعمها احلى بكتييييييير اوى ، و لو نحب السوبيا تبقى بطعم المانجة مثلا يمكننا اضافة طعم ولون صناعى بس انا مش بحبز اننا ندخل فيها الطعم واللون الصناعى وتبقى طبيعية احسن .
وعلى فكرة الوصفة دى سهلة اوى ومش بتاخد وقت ومجهود .


علمتني الحياة أن البراءة أروع وأجمل صور الحب والتفاؤل بين الأطفال .. علمتني الحياة أن علينا أن نتعلم من أخطائنا لأن الخطأ بداية الوصول إلى المعرفة الصحيحة والدقيقة والخطأ يجعل الفرد منا يتقدم ويتحدى نفسه أولا ثم الناس ليثبت أنه إنسان ... علمتني الحياة أن ابتسم في الوقت الذي ينتظرني فيه الآخرون أن أبكي ..علمتني الحياة أن أكون شامخة كالأشجار التي تصد الرياح .. علمتني الحياة بأنني أحب الناس أن يعاملوني كما أعاملهم .. علمتني الحياة أن الصبر مفتاح الفرج .. علمتني الحياة أن كل إنسان عليه أن يموت .. علمتني الحياة أن القرآن غذاء الروح .

بلح الشام

طريقة عمل بلح الشام :

المقادير :

4/1 كجم دقيق _ 4/1 لتر ماء _2/1 ك زيت _ ذرة ملح _ 4 بيضات _ زيت غزير للقلى .الشربات : 1كجم سكر _ 1 لتر ماء - عصير ليمونة كبيرة _ فانيليا .

طريقة التحضير :

نضيف نصف كوب الزيت على الماء وذرة الملح ونضعهم فى اناء على النار وبعد ان يغلى الماء جيدا نضيف الدقيق دفعة واحدة ونخلطهم جيدا مع التقليب المستمر على نار هادئة وبعد ذلك نرفع الاناء من على النار حتى يبرد جيدا ، وبعد ذلك نضيف البيض ونقلبه جيدا ويستحسن ان يقلب باليد ويعجن جيدا .نحضر قمع حرفه مشرشر خاص ببلح الشام او قمع كريم شانتيه بالبلبلة ونضع فيه العجينة ونضغط باليد وباليد الاخرى نقطعه لصوابع قصيرة او طويلة حسب الرغبة بعد ان تدهن اليد بالزيت للتقطيع حتى لا يلتصق العجين باليد ، ونقطع العجينة فى زيت القلى قبل ان نضعه على النار وبعد الانتهاء من التقطيع نضع المقلاة على نار متوسطة وبعد ما يتحمر جيدا يصفى من الزيت ونضعه فى الشربات ثم ننشله ونضعه فى مصفى سلك وبعد ان يصفى تماما ننقله فى طبق التقديم .

* الشربات : نضيف السكر و الماء و عصير الليمونة و الفانيليا على نار متوسطة ونتركه حتى يصبح شربات تقيل .

ملحوظات هامة :

1) يجب ان نضع اصابع بلح الشام فى زيت باااااااااارد وبعد الانتهاء من التقطيع نضعه على النار وذلك ليصبح مقرمش وناشف لاننا لو وضعناه فى زيت سخن يصبح طرى .

2) يجب ان يكون شربات بلح الشام بارد وسميك القوام .

3) يجب ان لا يقلب بلح الشام وهو على النار الا بعد ان يتماسك ويبتدى ينشف وياخد اللون الوردى حتى لا يتقطم بلح الشام فى المقلاة .

اللهم اذهب خوفنا ورعبنا.. وانصر حزبنا وصحبنا.. وأمن صدرنا وجنبنا.. وأذن بميلاد جهادنا.. وأذهب حرقة فؤادنا.. وأقر أعيننا بصلاح عيوبنا.. واجعل حبك إزارنا.. ورضاك شعارنا.. وإحسانك سرنا.. وشكرك أنهارنا.. وطاعتك جمالنا.. وعفوك وصالنا.. وجنتك دارنا.. برحمتك يا منعم يا متفضل.. فأنت الذي سجد لك سواد الليل.. ونور النهار.. وضوء القمر.. وشعاع الشمس.. ودوى الماء.. وحفيف الشجر.. فتقبل اللهم رجاءنا.. ودعاءنا.. يا أرحم الراحمين.. يا حنان.. يا منان..

الجلاش بالموز

طريقة عمل الجلاش بالموز :

المقادير :

400جم جلاش ( لفة جلاش ) _ 500جم موز _ 2م/ك سكر _ 3م/ك سمنة .الشربات : 1/2 1 كوب سكر _ 1/4 1 كوب ماء _ ليمونة _ باكو فانيليا .

طريقة التحضير :

نضع ملعقة سمن فى اناء ونقدحها ثم نضع ملعقتين السكر ونقطع الموز قطع صغيرة ونضيفه للسمن المقدوح ونقلبه حتى يكون كالكريمة ونطفى عليه ونتركه حتى يبرد ونقطع لفة الجلاش قطع طولية وناخذ كل ورقتين من الجلاش فوق بعض ونضع فيهم ملعقة صغيرة من الموز المطبوخ ونلفه مثل السمبوسة و نضعه فى صينية مدهونة سمن وبعد لف كل الجلاش نرش عليه سمن سايح و ندخله الفرن حوالى 20 دقيقة مع المتابعة واول ما يخرج من الفرن نصب عليه

الشربات .

طريقة عمل الشربات : نضع الماء والسكرفى اناء على النار واول ما يغلى نضع عصير الليمونة والفانيليا ونتركهم حوالى 25دقيقة على نار هادئة حتى يكون اصبح له قوام ولا نتركه حتى يصبح قوامه سميك ونتركه يبرد جيدا قبل ما نضيفه على الجلاش .

اجمل شيء فى الوجود ان تموت وانت ساجد للودود........وإذا كنت تريد السعادة فالزم القرآن.....وإذا كنت تريد المحبة فالزم الابتسامة..........وإذا كنت تريد المهابه فالزم قيام الليل.........وإذا كنت تريد الغنى فالزم الاستغفار........إذا كنت تريد الجنة فالزم الصلاة........ليس غريبا أن تحب الله فهو خالقك ولكن العجب أن يحبك

الايس كريم

طريقة عمل الايس كريم :

قبل ما اقولكم الطريقة احب اقولكم انى جربت طرق كتير اوى اوى للايس كريم من منتديات ومن كتب كتير ومفيش ولا طريقة حسيت فيها انى باكل ايس كريم زى بتاع بره ومعظم الطرق او كلهم تقريبا بيدخلوا فى الايس كريم البيض او النشا او الدقيق ولما بيتعمل بيبقى طعم مقولوكوش وكمان فيه طرق لازم فيها ماكنة الايس كريم وبتبقى مكلفة وطبعا انتوا عارفين ان البيض سعره غلى اوى ههههههههه

ابتديت استطعم الايس كريم بتاع بره واحس بمذاقه اوى واخمن هو مكون من ايه وقررت اعمل تجارب لغاية الحمد لله وصلت اخيرا بس ربنا وحده اللى يعلم ان كل الاكلات اللى جايباها اجتهدت فيها وانا اللى كتباها ومش منقولة من منتديات انما خبرتى فى المطبخ لانى بعرف اجيدها فقولت افيد بيها الناس وطريقة الايس كريم دى خلاصة تجاربى ومش واخدة الطريقة دى من اى حد ودى طريقتى وانا اللى اكتشفتها وكل اللى يدخل ياخدها ياريت يدفعلى بالفيزا عن طريق النت واحد دولار اهو الدولار الاخضر ينفع فى اليوم الازرق وان شاء الله الطريقة هتعجبكم اوى لانها موفرة فى الوقت والمجهود والنقدية وكمان الصيف دخل وأكل الايس كريم محبوب اوى فى الصيف .

المقادير :

1/2 1 لتر عصير محلى بكوب سكر ( مانجة او فراولة او جوافة او تمر او اناناس او اى عصير تحبوه ) _ 1/4 كجم كريم شانتيه خااااااااام مضاف اليه كوب سكر بودرة _ 10جم محسن ايس كريم .

طريقة التحضير :

نضرب الفاكهة فى الخلاط بماء وسكر زى ما بيتعمل العصير بالظبط ومن الافضل اننا بعد غسيل الفاكهة وتقطيعها لكى نضربها فى الخلاط نضع عليها السكر ونتركها حوالى ساعتين وبعدين نضربها فى الخلاط و نضعها فى الفريزر لمدة ساعة لكى تصبح مثل الماء المثلج ولا نتركها حتى تتجمد وبعد ذلك نخلط الكريم شانتيه الخام بكوب السكر البودرة ونضربهم بالعصير جيدا بمضرب سيلك يدوى او كهربائى ومن الافضل الكهربائى وبعد ذلك نضيف محسن الايس كريم للخليط ونخلطهم جيدا بالمضرب ثم نضع الخليط فى الفريزر وبعد نصف ساعة نخرجه ونقلبه وبعدين ندخله فى الفريزر تانى ونتركه فى الفريزر حتى يتجمد ونخرجه من الفريزر نأخد منه بملعقة الايس كريم ونقدمه فى الكاسات الخاصة بالايس كريم او اطباق الخشاف الزجاج او على قراطيس البسكوت الخاص بالايس كريم وبالهنا والشفا .

ملحوظة :

محسن الايس كريم هتلقوه عند العطارين الكبار اللى بيبيعوا الكريم شانتيه بالكيلو والشيكولاتة الخام وفيه ناس مخصوص لمستلزمات الحلويات فى العتبة وبيبيعوا المحسن ارخص بكتير من العطارين وميزة المحسن هو اللى بيعمل السمك والقوام للايس كريم ، و 10جم محسن ايس كريم عبارة عن معلقة كبيرة من المحسن .

ولما نيجى نشترى الكريم شانتيه من الافضل نجيبه من اللى بيتباع بالكيلو ويكون خام لان المخلوط بالسكر بيعطى كمية قليلة يعنى ربع كيلو الكريم شانتيه الخام بيعطى كمية ضعف الربع كيلو الكريم شانتيه المخلوط بالسكر علشان كدة بقول الخام احسن بس يكون من عطار البيع عنده مستمر علشان ميكونش مركون وطعمه متغير .

لكل ربع كيلو كريم شانتيه خام نضيف له كوب سكر بودرة و المعيار ده نعتبره قاعدة يعنى لو جيبنا الكريم شانتيه لعمل التورتة نضيف نفس معيار السكر للكريم شانتيه .

لو حبينا نعمل ايس كريم التمر بنجيب بلح امهات وننزع منه القشرة والنواة ثم نضربه فى الخلاط جيدا بدون وضع سكر نهائى وكمان الكريم شانتيه نضربه بعصير التمر بدون وضع سكر ليه لان التمر سكره عالى اوى ومش محتاج .

بالنسبة لايس كريم الفانيليا والشيكولاتة هقولهم فى موضوع لوحدهم هما و السوربيه ويارب الطريقة تعجبكم .

مفاتيح قراءة المقادير

ك = كوب ، كجم = كيلو ، م/ص = ملعقة صغيرة ، م/ك = ملعقة كبيرة .

الزبادى

طريقة عمل الزبادى :


المقادير :
1 كجم لبن _ 1 ك زبادى .

طريقة التحضير :
نغلى اللبن جيدا وبعد الغلى نتركه حتى يصبح دافئ ثم نضيف كوب الزبادى ونقلبه جيدا وبعد ذلك نصبه فى اكواب ونضع الاكواب فى صينية بها ماء دافئ ونكون مدفيين فرن البوتوجاز يعنى نشغل الفرن لمدة دقيقتين ونطفيه يكون اصبح دافى وبعد كدة نحط الصينية بداخله بعد تغطيتها بقطعة قماش نضيفة وياريت لو نضع على قطعة القماش اى حاجة تقيلة زى مثلا غطا الصينية او صينية شاى مدورة وكل دى ملحوظات بتنجح عمل الزبادى و لو بنعمل الزبادى باستمرار نسيب اخر كوب من الزبادى اللى عملناه ونعمل بيه الزبادى الجديد بدل ما نضطر نشترى كوب زبادى من بره وعلشان الزبادى يتعمل بياخد حوالى 6 ساعات نغطيه ونتركه فى فرن البوتوجاز بس ما نحاولش خلال ال6 ساعات اننا نكشف غطاه ونبص عليه كل شوية .

ملحوظة : الماء اللى هنضعه فى الصينية اللى هيكون حول الاكواب لازم يكون دافئ مش سخن وكذلك الفرن يكون دافئ مش سخن لانه لو سخن هتلاقوا الزبادى معظمه مية ومش متجمد كويس وطعمه مش حلو .


ضع شيئاً واحداً في بالك فقط هو أن الله يراقبك وستموت وحدك وسوف تسأل وحدك وستبعث وحدك وستدخل الجنة أو النار وحـــــــــــدك فمالك ومال للناس ماذا يفعلون إنج بنفسك فطالما حرصت فيما فات أن تلبي رغبات نفسك فمؤكد لو ان نفسك تتحدث لقالت أرجوك لا تلقيني في النار دعنا نر إن كان باستطاعة الشيطان أن يتصدى لشيء كهذا هذه المر ة متي أموت؟ الآن؟ غدا؟لا أعلم ...كيف أموت علي السرير ؟ في الطريق؟ وأنا علي وضع معصية أم وأنا أطيع؟

فطيرة الدجاج بالخضار

طريقة عمل فطيرة الدجاج بالخضار :



المقادير :
500 جم جلاش ( لفة جلاش) _ 1/4 كجم فلفل رومى اخضر او الوان _ 2 بصلة متوسطة _ 2 حبة جزر مبشور _ 1/2 كجم فيليه دجاج _ 4 م/ك زيت _ 3 م/ك سمن سايح _ 2 م/ص ملح _ 1/2 زعتر _ 1/4 م/ص حبهان _ 1/2 م/ص فلفل اسود _ 1/2 م/ص بهارات .
طريقة التحضير :
نقطع البصل والفلفل حلقات رقيقة ونبشر الجزر ونقطع صدور الدجاج الى شرائح صغيرة مثل الشاورمة ثم نحضر طاسة ونضعها على النار ونضع فيها الزيت وبعد ان يقدح نضيف شرائح الدجاج ونقلبها لمدة دقيقتين ثم نضيف الفلفل والبصل والجزر ونستمر فى التقليب مع اضافة التوابل ونجهز صينية مقاس 28سم وندهنها بالسمن ونأخذ ورقتين من الجلاش ونضعهم فى الصينية بحيث ان نصف الورقتين داخل الصينية والنصف الاخر خارجها وندهنهم بالسمن ونستمر هكذا داير ما يدور حتى نخلص كمية الجلاش وكل ما نضع ورقتين ندهنهم بالسمن وبعد ما ننتهى من وضع ورق الجلاش نصب خليط الدجاج والفلفل والبصل والجزر بداخله ونقفل ورق الجلاش على الخليط وكل ما نقفل ورقتين من الجلاش ندهنهم بالسمن لغاية ما تتقفل كلها وندهن الوجه سمن ونضع ربع كوب لبن نرشرشه على الوجه وبعد ذلك ندخله الفرن لمدة 15 دقيقة .

ملحوظة : طبعا واحنا بنفرد الجلاش فى الصينية نحاول ننجز ونعمل بسرعة لكى لا ينشف الجلاش والموضوع ده بياخد حوالى خمس دقائق ، وممكن نعملها بلحمة مقطعة مثل الشاورمة او مفرومة وممكن بفيليه سمك حسب رغبتكم وحسب اللى متوفر عندكم ولكن لو استخدمنا لحمة مقطعة قطع صغيرة مثل الشاورمة لابد من تتبيلها وتركها فى الثلاجة من قبلها بيوم حتى لا تأخذ وقت كبير فى التسوية على النار وعندما نضعها فى الزيت ونشوحها لايمكننا اضافة الخضار عليه الا بعد ما يستوى يعنى بعد ما نقلبه نضع عليه نصف كوب ماء ونتركهم على النار حتى نشعر انها استوت ونكشف الغطا من عليها حتى تتبخر المياه الموجودة بداخله ثم نضع الخضار بعد ذلك ، وياريت الخضار لانتركه يستوى على النار علشان قيمته الغذائية لا تقل وان شاء الله وصفة هتعجبكم اوى .

البيتزا المزخرفة

طريقة عمل البيتزا المزخرفة :

المقادير :

العجينة : 2ك دقيق _ 2 م/ص خميرة جافة _ 1 م/ص ملح _ 2 م/ص سكر _ 3/4 كوب ماء دافئ _ 2 م/ك زيت.

الحشو : صباع هودوج كبير(مقطع قطع صغيرة وسميكة تشبه المربعات الصغيرة ) _ 1/4 كجم سجق شرقى _ بصلة كبيرة مقطعة الى حلقات رقيقة _ 2 حبة فلفل رومى _ 1م/ص ملح _ 1/4 م/ص فلفل اسود _ 1/4 م/ص بهارات _ 1/4 م/ص زعتر _ زيتون اسود واخضر _ صلصة طماطم _4 م/ك زيت .

طريقة التحضير:

نقطع الفلفل حلقات رقيقة والبصل ويمكننا وضع فلفل اخضر حامى حسب الرغبة ونقطع السجق قطع صغيرة ونضع 4 ملاعق زيت فى طاسة على النار وعندما الزيت يسخن نضع السجق ونقلبه حوالى دقيقتين وبعدين نضيف الفلفل الاخضر الرومى والبصل ونقلبهم حتى نشعر ان البصل دبل ولكن لانتركهم حتى يستوى على النار ونضع التوابل عليهم ونقلبهم جيدا .

نقلب الدقيق والملح والسكر والخميرة اى كل المكونات الجافة مع بعضها ونعمل حفرة فى الدقيق ونضع فيها الماء و2 م/ك من الزيت ونعجن حتى تصبح عجينة ملساء ونغطيها بكيس بلاستيك ونتركها فى مكان دافئ حتى تخمر اى حجمها يتضاعف ونقطعها الى قطعتين الثلث والثلثين ، نأخذ القطعة الكبيرة وهى الثلثين ونفردها فى صينية مقاس 28سم ، ونأخذ القطعة الثلث نقطع منها قطع صغيرة فى حجم الليمونة الصغيرة وبعد ما ننتهى من التقطيع نأخذ كل قطعة ونفردا بأصابعنا ونضع فيها قطعة من الهوت دوج ونقفلها بحيث تكون مدورةفى حجم الليمونة ونضعها على طرف العجينة المفرودة فى الصينية وهكذا حتى نغطى اطراف العجينة ونكون مسخنين الفرن قبل ما ندخلها بداخله ، وبعد دخول الصينية ونحس انها استوت نصف سوى نخرجها من الفرن ونضع عليها صلصة الطماطم ثم خلطة السجق والبصل والفلفل وحلقات الزيتون ونضع جبنة موزريلا على الوجه وندخلها الفرن لكى نكمل سواها ولما الوجه يحمر نخرجها من الفرن وهى بتاخد وقت حوالى 20 دقيقة وطبعا بيختلف من فرن لاخر ولابد ان نتابعها داخل الفرن .

ملحوظة : نحاول واحنا بنقطع العجينة اننا نعمل كل حاجة بسرعة قبل ما تخمر فى الصينية لانها لو خمرت وبعد كدة نسويها هيكون طعمها مشابه للفينو ، وناخد بالنا واحنا بنعمل قطع العجين الصغيرة وبنضعها على طرف العجينة المفرودة فى الصينية اننا نترك مسافات بين كل واحدة و واحدة لانها لما تستوى هيلتصقوا ببعض لان حجمهم هيزيد ويتضاعف ، واحنا برده بنفرد العجينة فى الصينية ياريت نترك مسافة حوالى سم من الجوانب لاننا هنضع عليها قطع العجين الصغيرة بالهوت دوج وهتاخد مكان ، ونحاول نضغط على قطع العجين المدورة المحشية بالهوت دوج واحنا بنضعها على طرف العجينة المفرودة فى الصينية لكى لا تسيب من بعضها بعد ما تستوى ، ومهم جدا اننا نضع الجبنة الموتزريلا وان لم تتوافر نكسر بيضة على وجه البيتزا لكى تجعل الحشو متماسك على البيتزا عند تقطيعها لكى لايقع فى التقطيع وينشف الحشو من حرارة الفرن .

العيش الصاج

طريقة عمل العيش الصاج:

المقادير :

1/2 كجم دقيق _ 2م/ص خميرة جافة _ 1/2 م/ص ملح _ 2 م/ص سكر _ ماء دافئ للعجن .

طريقة التحضير :

نضع الدقيق فى اناء ونضيف الخميرة الجافة والملح والسكر ونخلطهم جيدا ونعمل حفرة فى الدقيق ونضيف الماء الدافئ حوالى كوب ونص ماء ونعجنه ونضيف ماء بالتدريج ونعجن حتى تصبح عجينة ملساء طرية نوعا ما وبعد ذلك تغطى بكيس بلاستيك وتترك فى مكان دافئ مثل فرن البوتوجاز حتى تختمر حوالى ساعة بمعنى انها حجمها يتضاعف وبعد ذلك تقطع قطع فى حجم البيضة البلدى ونضعها على دقيق مرشوش ونرش فوقها دقيق ونتركها ترتاح حوالى عشر دقائق ونكون مجهزين صاجة الفرن على عين البوتوجاز من فوق ونحطها مقلوبة او صينية قديمة ونقلبها او طاسة ونقلبها ونعمل على ظهرها ونضعها على عين البوتوجاز و نوقد عليها نار هادئة قبل ما نبتدى فى فرد العجين ثم نفرد كل قطعة من العجين بالنشابة حتى تصبح فى حجم رغيف العيش البلدى او اكبر شوية وبنفرده كويس ويكون غير سميك ونضعه على الصاجة السخنة علطول بعد ما ننفضه من الدقيق كويس ومش بيكمل دقيقتين ونقلبه وبعدين نشيله ونحط غيره ويمكنكم بعد ان يبرد نحفظه فى كيس فى الفريزر ونطلع منه للاستخدام وبيبقى حلو اوى فى سندوتشات الشاورمة "نضع الشاورمة عليه ومايونيز او كاتشب حسب الرغبة ونبرومه ويقطع نصفين ويقدم مع سلطة " .

ملحوظة: يمكنكم استخدام الخميرة الطازجة مالم تتوفر الجافة ولكن عند استخدامها نضعها فى كوب ونضيف السكر عليها ونتركها حوالى عشر دقائق ونضعها فى حفرة الدقيق مع الماء الدافئ ، وعند فرد قطع العجين نضعها على الصاجة فوق النار بمجرد الفرد ولا نتركها حتى تختمر بعد ما اتفردت .

اللهم انك تعلم سرى وعلانيتى فاقبل معذرتى . وتعلم حاجتى فاعطنى سؤالى . وتعلم ما فى نفسى فاغفر لى ذنبى .. اللهم انى اسالك ايمانا يباشر قلبى . ويقينا صادقا حتى اعلم انه لن يصيبنى الا ما كتبته على . وراضى بما قسمته لى ياذا الجلال والاكرام .

السويسرول

طريقة عمل السويسرول :

المقادير :

1 ك دقيق _5 بيضات _1 ك سكر بودرة _1م/ص بيكنج بودر _ باكو فانيليا _ ورق زبدة .للحشو والتجميل: مربى او كريم شانتيه او شيكولاتة .

طريقة التحضير :

ادهنى صاج متوسط (28سم ×38سم ) بالسمن وضعى فيه ورق الزبدة ابتداء من الجوانب كلها ثم ادهنيه بالسمن ورشى بعض الدقيق ، اشعلى فرن البوتاجاز لكى يسخن الفرن ، اكسرى البيض كل واحدة لوحدها حتى تتجنبى ان تكون واحدة منهم فاسدة ثم ضعيه فى وعاء كبير واضربيه حتى يغلظ قوامه ثم ضيفى السكر والفانيليا واضربيهم جيدا ، وبعد ذلك انخلى البيكنج بودر مع الدقيق واضيفيهما الى الخليط وصبيهم فى الصاج وادخليه الفرن لمدة عشر دقائق .الفرن يجب ان نجعل النار هادئة قبل دخول الصاج ، واذا اردت ان يكون سويسرول بالشيكولاتة اضيفى ملعقتين كبيرة من الكاكاو اللى الدقيق قبل اضافته للخليط .افرشى ورقة زبدة على ترابيزة المطبخ ورشيها بالسكر البودرة و اقلبى عليها الصاج فور خروجه من الفرن واتركيه حتى يبرد تماما ثم ارفعى الصاج وضعى المربى بعد تخفيفها بقليل من الماء فوق السويسرول مع ترك 3سم من كل جانب بدون تغطية من المربى وبعد ذلك يمكننا ان نضع كريم شانتيه او شيكولاتة او نتركه كذلك ونكتفى بالمربى ونلفه بورقة الزبدة على شكل اسطوانة ونتركه فى التلاجة حوالى8ساعات وبعد تخريجه من التلاجة نسحب ورقة الزبدة منه ونزينه من الخارج بالكريم شانتيه او الشيكولاتة او تركه كذلك حسب الرغبة ونضعه مرة اخرى فى التلاجة حتى يتماسك وعند التقديم يقطع مثل الحلقات وممكن ان يقدم كفطار او عشاء مع فنجان شاى بلبن .

اللهم اني اشهدك اني قد سامحت جميع المسلمين والمسلمات الاحياء منهم والاموات. اللهم إني قد غفرت مابيني وبين الناس فاغفر مابيني وبينك .

العيش الشامى

طريقة عمل العيش الشامى :

المقادير :
1/2 كجم دقيق _ 2م/ص خميرة جافة _ 1/2 م/ص ملح _ 2 م/ص سكر _ ماء دافئ للعجن .
طريقة التحضير :
نضع الدقيق فى اناء ونضيف الخميرة الجافة والملح والسكر ونخلطهم جيدا ونعمل حفرة فى الدقيق ونضيف الماء الدافئ حوالى كوب ونص ماء ونعجنه ونضيف ماء بالتدريج ونعجن حتى تصبح عجينة ملساء طرية نوعا ما وبعد ذلك تغطى بكيس بلاستيك وتترك فى مكان دافئ مثل فرن البوتوجاز حتى تختمر حوالى ساعة بمعنى انها حجمها يتضاعف وبعد ذلك تقطع قطع فى حجم البيضة البلدى ونضعها على دقيق مرشوش ونرش فوقها دقيق ونتركها ترتاح حوالى عشر دقائق ونوقد الفرن حتى يسخن قبل ما نبتدى فى فرد العجين ثم نفرد كل قطعة من العجين بالنشابة حتى تصبح فى حجم غطا علبة السمنة ونضعها على صاجة الفرن المباشرة للنار علطول بعد ما ننفضه من الدقيق كويس ومجرد ما يقب وينتفخ نخرجه فى الحال حتى لا ينشف ويمكنكم بعد ان يبرد نحفظه فى كيس فى الفريزر ونطلع منه للاستخدام وبيبقى حلو اوى فى سندوتشات الفطار .

ملحوظة: يمكنكم استخدام الخميرة الطازجة مالم تتوفر الجافة ولكن عند استخدامها نضعها فى كوب ونضيف السكر عليها ونتركها حوالى عشر دقائق ونضعها فى حفرة الدقيق مع الماء الدافئ ، وعند فرد قطع العجين ندخلها الفرن بمجرد الفرد ولا نتركها حتى تختمر بعد ما اتفردت .

الهامبورجر

طريقة عمل الهامبورجر:

المقادير:

2/1 كجم لحمة مفرومة _ بصلة متوسطة مفرومة _ 1 بيضة _ 5 م/ك بقسماط _ 1م/ص فلفل اسود _ 1/2 م/ص زعتر _ 1 م/ص ملح _ 2/1م/ص كمون _ 1/2 م/ص بهارات _ ورقة زبدة .

طريقة التحضير :

نحضر اناء ونضع فيه بصلة مفرومة فرم ناعم ونضيف التوابل ونقلبهم جيدا وبعد ذلك نضيف اللحمة ونخلطهم جيدا ، ثم نكسر البيضة فى طبق صغير للتأكد من انها سليمة ونضعها على اللحمة المتبلة ونقلبهم وبعد ذلك نضيف البقسماط بالتدريج حتى تتماسك اللحمة ويتجانس الخليط ، ونجهز ورقة الزبدة ونقطعها قطع مربعة ونأخذ من الخليط ونصنع كور متوسطة الحجم ونأخذ ورقة ونضع عليها هذه الكورة ونضع من فوقها ورقة اخرى ونضغط عليها باليد حتى تكون مستديرة وهكذا حتى نفاذ الكمية ويمكن وضعه فى الفريزر وتكون جاهزة للاستخدام ،نحضر طاسة ومن الافضل تكون تيفال ونضع فيها زيت قليل يعنى مسحة من الزيت ونضع الهامبورجر ونقلبه على الناحيتين حتى ينضج ويقدم فى عيش كيزر ومع خس و حلقات من الطماطم والخيار المخلل او حسب الرغبة واتمنى ان الطريقة تعجبكم .

ملحوظة : ياريت اللحمة المفرومة تكون من غير دهون يعنى لحم احمر صافى انما لو هتشتروا اللحمة لعمل كفتة مشوية يبقى لازم تكون فيها نسبة من الدهون .

‏لقد وصف النبي صلى الله عليه وسلم الذي يفرّط في صلاتي الفجر والعشاء في الجماعة بأنه منافق معلوم النفاق! فكيف بمن لا يصليها أصلا .. لا في جماعة ولا غيرها ... فقد قال النبي ‏ ‏صلى الله عليه وسلم ‏: « ‏ليس صلاة ‏‏ أثقل على المنافقين من الفجر والعشاء ولو يعلمون ما فيهما (يعني من ثواب) لأتوهما ولو حبوا (أي زحفا على الأقدام) » رواه الإمام البخاري في باب الآذان

سلطة الطحينة

طريقة عمل سلطة الطحينة :

المقادير :
1/2 ك طحينة _1/2 ك ماء _ 1 ك زبادى _1/2 ليمونة _1/2 م/ص ملح _1/2م/ص فلفل اسود _ 1 م/ك خل _ 1 م/ك زيت ذرة او زيتون .
طريقة التحضير :
نضيف جميع المكونات ماعدا الزبادى ونقلبها جيدا وبعد ان تختلط نضيف الزبادى ، وتقدم مع المشويات والسندوتشات وبالهنا والشفا .

الطحينة

طريقة عمل الطحينة :

المقادير :
1ك سمسم ابيض مطحون _1/2 1 ك دقيق _1 ك زيت .
طريقة التحضير :
نطحن السمسم جيدا ثم نخلطه بالدقيق وبعد ذلك نضع الزيت ونضربهم جيدا .

اللهم انى اسألك ايمانا دائما، وأسألك قلبا خاشعا، وأسألك علما نافعا، وأسألك يقينا صادقا، وأسألك دينا قيما، وأسألك العافية فى كل بلية ، وأسألك تمام العافية ، وأسالك دوام العافية ، وأسألك الشكر على العافية ، وأسألك الغنى عن الناس .

التونة بالمايونيز

طريقة عمل التونة بالمايونيز :

المقادير :
3علب تونة _ربع خسة صينى _ 2 ملعقة كبيرة مايونيز _ 1 ملعقة مستردة كبيرة _ملح _ 2 ليمونة _ شطة حسب الرغبة .
طريقة التحضير :
نفتح التونة ونضعها فى اناء بعد ان نصفيها من زيتها ونقطع الخس قطع صغيرة ونضيفه للتونة ثم نضيف المايونيز والمستردة والشطة والليمون والملح ونقلبه جيدا ، طريقة سهلة جدا وموفرة للوقت وشهية وتنفع لعمل سندوتشات تيك اواى .

اللهم انك تعلم اني اعصاك ولكني احب من يطيعك فاجعل اللهم حبي في من اطاعك شفاعة لمن عصاك .

المايونيز

طريقة عمل المايونيز :

المقادير :
بيضة _ 2 م/ك خل _نصف ليمونة _ 1 ك زيت _ ذرة ملح .
طريقة التحضير :
نكسر البيضة فى دورق الخلاط ونضع عليها الليمون والخل والملح والسكر ونضربهم فى الخلاط ويضربوا ثم نضع الزيت بالتدريج ويضربوا جميعا .ملحوظة : الزيت هو المسئول عن تماسك المايونيز،بمعنى ان الزيت هو الذى يجعل البيض يتماسك ويصبح مايونيز ، واللمون والخل بيعطى المايونيز اللون الابيض ومن الافضل يضربوا بمضرب كهربائى للتحكم فى عمل المايونيز .

سألوني .. قالوا كيف ماهذا الثبات وحولنا فتن تهز الراسيــات أليس يغريكِ زمان الشهوات أليست تشتهي نفسكِ هذه الحياة فأجبتهم والقلب يمـــلأه اعتزاز لا تشتهي نفسي لذائذ ناقصات لمــا اشتهيتم اشتهـــيت مثلـكم لكن أهــدافي ستبقى خـــالدات أريد قصــراً لا يهدده زوال أريد عــيشــاً ليس يقطعه ممـــــات أريد حوريات أية في الجمال وأريد أنهاراً بقصري جاريات فعـقولنا إن لم تبلغـنـــا الجـنــان فحياتـنا ليست حياةً بل ممات .

ارز بالقرفة بسبحان الله

طريقة عمل ارز بالقرفة بسبحان الله :

المقادير :
1/2كجم ارز _ م/ص قرفة _ 2 م/ك سكر _ 3ك ماء _ 2م / ك سمنة _ ملح .
طريقة التحضير :
نضع السكر فى إناء(ونقول سبحان الله) ونضع معه 2ملعقة ماء ونضعهم على النار مع التقليب المستمر(ونقول سبحان الله) حتى يصبح لونهم بنى غامق اى يصبح كراميل (ونقول سبحان الله) ثم نضيف الماء والملح والقرفة والسمنة ويترك حتى الغليان (ونقول سبحان الله) ونغسل الارز ونضعه وتكون النار متوسطة (ونقول سبحان الله) وعندما يشرب مائه نجعل النار هادئة (ونقول سبحان الله) ، وبعد ان ينضج نضعه فى قالب ونساويه ونقلبه على طبق مسطح ويمكننا ان نضع عليه كبد وقوانص بالبصل وزبيب (ونقول سبحان الله) .
"سبحان الله وبحمده سبحان الله العظيم " .

الحواوشى

طريقة عمل الحواوشى:

المقادير:
ربع ك لحمة مفرومة _بصلة _فلفل اخضر _ ثمرة طماطم _ 2 رغيف _ ملح _ فلفل اسود _ بهارات _ زعتر _ زنجبيل .
طريقة التحضير:
تقطع البصلة قطع صغيرة ونضع ملعقة سمنة فى وعاء ونقدحها ونضع فيهاالبصل وبعد ذلك نقطع الفلفل و الطماطم ونضعهم على البصل ونقلب حتى يدبل البصل والفلفل والطماطم ونضع الملح والتوابل ويترك ليبرد ثم نضع اللحمة ونقلبه جيدا ونفتح الرغيف من الجانب ونضع فيه اللحمة ونفردها بداخله ثم ندهن الرغيف بالسمنة او الزبدة من الامام والخلف ونضعه فى صينية داخل الفرن فوق صاجة الفرن اى على النار مباشرة حتى لا ينشف اكثر من اللازم ونتركه لمدة 7 دقائق ثم نقلبه ونتركه حتى يستوى ويقدم سخن مع حلقات الخيار والخس.

" ستة أشياء إذا ذكرتها هانت عليك مصيبتك : أن تذكر أن كل شيء بقضاء وقدر ,وأن الجزع لا يرد القضاء وأن ما أنت فيه أخف مما هو أكبر منه, وأن ما بقي لك أكثر مما أخذ منك , وأن لكل قدر حكمة لو علمتها لرأيت المصيبة هي عين النعمة , وأن كل مصيبة للمؤمن لا تخلو من ثواب ومغفرة أو تمحيص أو رفعة شأن أو دفع بلاء وما عند الله خير وأبقى ".

الكبدة الاسكندرانى

طريقة عمل الكبدة الاسكندرانى :

المقادير :
1/2ك كبدة _ فلفل اخضر _ 2بصلة كبيرة _ فلفل اسود _ ملح .

طريقة التحضير :

تقطع الكبدة قطع صغيرة ، ويقدح قليل من الزيت ونضع فيه الكبدة وتقلب باستمرارلمدة 5دقائق ثم نضع البصل والفلفل ونقلب ونضع التوابل وتترك لمدة ربع ساعة مع التقليب وتقدم سندوتشات فى عيش فينو او عيش صاج مع مايونيز وكاتشب حسب الرغبة.
" كان صلى الله عليه وسلم كان يقول لاصحابه "من بات طاهرا وتوضا قبل ان ينام بات معه ملك كلما تقلب قال الملك اللهم هذا عبدك بات نظيفا فاغفر له" يعنى كل اللى هتعمله انك هتتوضى و تنام على طهاره وطول ساعات نومك هتستغفر لك الملائكه " .

الدجاج على الطريقة الامريكية (دجاج كنتاكى )

طريقة عمل الدجاج على الطريقة الامريكية (دجاج كنتاكى ) :
المقادير:
فرخة مقطعة 8 قطع (1كجم-1/2 1 كجم وزنها ) _بصلة مفرية 1/2 1 م/ك ملح _ 1 م/ص بهارات _ 2 ملعقة مستردة _م/ص فلفل اسود _1/2 م/ص حبهان _ م/ص زعتر _م/ص كمون _ 3م/ك خل _2 م/ك كارى _ م/ ص زنجبيل _ 2 م/ص بيكينج بودر _1/4 كجم دقيق _ 2بيضة .
طريقة التحضير :
تقطع الفراخ وتغسل جيدا وتتبل بالبصل والملح والبهارات والفلفل الاسود والمستردة والخل وتترك 24ساعة على الاقل حتى تشرب من التوابل ، نقسم الدقيق فى وعائين نترك الوعاء الاول بدون اضافات اما الوعاء الثانى نضيف عليه الكارى والبيكينج بودر ونصف ملعقة فلفل اسود ويقلبوا جيدا ،وبعد ذلك نضع قطع الفراخ فى الدقيق العادى وتلف بيه ثم فى البيض ثم فى الدقيق المخلوط ونتركها حوالى 30 دقيقة فى الفريزر وبعد ذلك نضعها فى الزيت المغلى الغزير فور خروجها من الفريزر لمدة 20 دقيقة ، وتقدم ساخنة مع بطاطس محمرة صوابع وسلطة خضرا .
ملحوظة :
يجب ان يكون الزيت مغلى وغزير اى يغطى قطع الفراخ وبعد وضع الفراخ فيه يجب ان تكون النار هادئة لكى تستوى الفراخ جيدا وعندما يصبح لونها ذهبيا تكون نضجت ،ويمكن وضع توابل اخرى مثل جوزة الطيب وكبيبة صينى ودبس رمان حسب المقدرة تضاف للتتبيل الفراخ .
" مثل الذي يذكر ربه والذي لايذكر ربه مثل الحي والميت فاذكر الله عبد الله الا بذكر الله تطمئن القلوب وافضل الذكر سبحان الله والحمد لله ولا اله الا الله والله اكبر "

وجبات تيك اواى

السلام عليكم ورحمة الله وبركاته

معظم الناس من كبار وصغار بيحبوا الاكلات التيك اواى ودى طبعا بتبقى مكلفة والله اعلم اذا كانت على مستوى النظافة الذى نرجوه ام لا .

انا فكرت فى ان انشئ مدونة احط فيها افكارى واساعد بيها غيرى ويبقى علم انشره وربنا يجازينى عليه خير ويتقبله منى ان شاء الله .

ويارب الاكلات التى سوف اكتبها لكم تنال اعجابكم ولو فيه اى تعليق منكم احب انى اعرفه.

.مفاتيح قراءة المقادير :
ك = كوب ، كجم = كيلو ، م/ص = ملعقة صغيرة ، م/ك = ملعقة كبيرة .